Preassadieđáhus 1.9.2010 (SME)

Details

Category: Presseaussendungen

Buorit vuostáiváldit,

Njukčamánus 2010 álggii Eurohpá Uniovnna 7. rápmaprográmmii gulli máŋggadieđalaš dutkanprošeakta ELDIA (European Language Diversity for All). Prošeavttas dutkojuvvojit njealljenuppelohkái suoma-ugralaš giellaminoritehta, mat ellet hui iešguđetlágan diliin ja birrasiin; ná lea dárkkuhus háhkat ođđa dieđu ja ovddidit ipmárdusa Eurohpá nuppástuvvi giellakárttas ja máŋggagielatvuođa iešguđetlágan hámiin.

Davviriikkain ELDIA-prošeavtta olis dutkojuvvojit davvisámegiella, kvenagiella ja boares suomagiella Norggas, meänkieli ja suomagiella Ruoŧas, ja gárjilgiella ja esttegiella Suomas. Eará guovlluin Eurohpás dutkojuvvojit ee. vepsegiella Ruoššas, võro- ja setogiella Estteeatnamis, ja uŋgaragiella Slovenias ja Nuortariikkas. Guhtege dutkojuvvon giella ovddasta iešguđetlágan minoritehtagiellatiippa: davvisámegiella lea eamiálbmotgiella, kvenagiella, meänkieli ja suomagiella fas álbmotlaš minoritehtagielat, maidda ráját ja sirdolašvuohta leat maiddái váikkuhan.

ELDIA:s leat fárus gávcci universitehta guđa Eurohpá riikkas. Prošeavttas leat áššedovdit sosiologiija, statistihka, gielladiehtaga ja vuoigatvuođadiehtaga surggiin. Davveguovllu minoritehtaid dutkamuša kordinere Oulu universitehta.

Min lahkonanvuogis lea guovddážis minoritehtagielaid hálliid aktiiva doaibman, ealli máŋggagielatvuođa ja gielaid vuorrováikkuhusa dárkodeapme. Min prošeavtta dutkit leat beroštuvvan minoritehtagielaid geavaheamis kommunikerengaskoapmin iešguđet joavkkuid gaskka. Dan váras mii čoaggit materiála jearahallanskoviid, joavkojearahallamiid ja individuála sáhkkehallamiid bokte.

Prošeavtta ulbmilin lea ráhkadit Eurohpá gielaid ealasvuođabarometra (EuLaViBar), gaskoami, mainna sáhttá árvvoštallat gielalaš máŋggahámatvuođa ja gielaid áitatvulošvuođa, ja man giellaservošat, organisašuvnnat ja giellapolitihkalaš eiseválddit sáhttet atnit ávkin. Prošeavttas ja dan bohtosiin dieđihuvvo min neahttasiiddus www.eldia-project.org, ja midjiide oažžu áinnas váldit oktavuođa.

Ustitlaš dearvvuođaiguin,

professor Helena Sulkala

Oktavuohtadieđut:
Marko Marjomaa (davvisámegiella) e-poasta This email address is being protected from spambots. You need JavaScript enabled to view it.
Laura Arola (meänkieli) e-poasta This email address is being protected from spambots. You need JavaScript enabled to view it.
Anna-Kaisa Räisänen (kvenagiella) e-poasta This email address is being protected from spambots. You need JavaScript enabled to view it.